Waiting to See What would happen next

මේ සටහන ලියවෙන්නේ ඉවවහා ගිය ප්‍රීතියකින්ද ඒ හා සමානම වූ දුකක්ද මුසුවූ හැඟීමකිනි.

ප්‍රීති වන්නට කාරණය..

අදින් වසර විස්සකට පමණ ඉහත දිනයක මා සිටියේ ශිෂ්‍යත්ව විභාගයකට සුදානම් වෙමින්ය. ශිෂ්‍යත්වයට තවත් ඇත්තේ සතියකටත් අඩු කාලයක්ය. වැරදීමකින් රූපවාහිණිය ක්‍රියාත්මක් කල මාගේ නෙත ගැටුනේ සංචාරක ඔස්ට්‍රේලියානු කණ්ඩායමට එරෙහිව ශ්‍රී ලංකා කණ්ඩායම තරඟ වදින ආකාරයයි. ඒ රොමේෂ් කළුවිතාරණ ක්‍රීඩා කල පළමු තරඟය වූ අතර විශිෂ්ඨ ඉනිමක් ක්‍රීඩා කල ඔහු එහිදී ශතකයක් වාර්තා කල අතර තරඟය පුරාම ඉදිරියෙන් සිටි ශ්‍රී ලංකා කණ්ඩායම අවසානයේදී ලකුණු දහසයකින් පරාජයට පත් විය. මාගේ ශිෂ්‍යත්ව විභාගයට පෙර දින තරඟය අවසන් වූ අතර සියලු පාඩම් වැඩ අතැර රූපවාහිණිය වෙත මා බැඳ දමා තබන්නට ඒ තරඟය සමත් විය.ක්‍රිකට් ක්‍රීඩාවේ ඇති චමත්කාරයට මා වශී වූයෙමි. තවදුරටත් එය නිකන්ම නිකන් ක්‍රීඩාවක් පමණක් නොව ජීවිතයටම බද්ධ වූ අංගයක් විය.ඔව් බහුතරයක් ශ්‍රී ලාංකිකයන් සේම මමද ක්‍රිකට් ක්‍රීඩාවට ආදරය කරන්නෙක් වූවෙමි.ඔව්. මමත් ඔබ සේම අපේ කොල්ලන් ක්‍රිකට් ලෝකය දිග්විජය කරද්දී බොහෝ ප්‍රීති වුනෙමි. ඔවුන් අසාර්ථක වෙද්දී ඒ හා සමානව දුක් වූයෙමි.

නමුත් ලෝකය ඉතිහාසයේ කවරදාටත් වඩා වේගයෙන් වෙනස් වන්නට විය. ක්‍රීඩාවේදිත් එය එසේම විය. තව දුරටත් ක්‍රිකට් යනු ක්‍රීඩාශීලීත්වය පමණක් පෙරදැඩි කරගත් ක්‍රියාවලියක් නොවුනු අතර එය ක්‍රමක්‍රමයෙන් ව්‍යාපාරයක් බවට පත් විය. බොහෝ ලාභ ලබන ව්‍යාපාරයක් බවට පත් විය.ක්‍රීඩාව හරහා මුදල් දිය ඇලි පරිපාලකයින් අතට ගලා එන්නට විය. ඇස් පනා පිට දූෂන වංචා සිදුවෙද්දි වගකිව යුත්තන් අඳ ගොළු බිහිරන් සේ මුනිවත රකින්නට විය.

ක්‍රීඩකයින්ගේ දක්ෂතා මතින් ගලා ආ මුදල්, වරප්‍රසාද හමුවේ ගිණිකන වැටුන පාලකයින් ක්‍රීඩකයින් නොමැතිව වුවද ක්‍රීඩාව කල හැකිය යන මානසිකත්වයට පත් විය.සිදුවන අකටයුතුකම් දැක බොහෝ පිරිස් ඉවත බලා ගනිද්දි එයට විරුද්ධ වන්නට සිටියේ අතලොස්සකි. ඒ අතරින් ශ්‍රී ලංකා ක්‍රිකට් ලෝක ක්‍රිකට් සිතියමේ ඔසවා තැබූ අර්ජුණ රණතුංග පෙරමුණ ගත්තේය.

අවසානයේදී, සුදුසුම මොහොතේ සුදුසුම පුද්ගලයා ලෝකය හමුවේ ඒ වනවිටත් පශ්චාත් භාගය හෙළි වී තිබූ ශ්‍රී ලංකා ක්‍රිකට් ආයතනය  නම් වූ වෛශ්‍යාවගේ නිරුවත වැසුනු සියළු සළු පිලි උනා දැම්මේය.

ඔව්. එය කවුරුන් විසින් හෝ කල යුතුව තිබුනේය.

ඉතින් සංගා, ඔබ එහි ඇති සියළු ප්‍රතිවිපාක දැන දැනත් එය කලේය. ඔව් ඔබගේම වචනවලින් කියනවානම් සිංහල, දෙමළ, මුස්ලිම්, බර්ගර්, බෞද්ධ, හින්දු, ඉස්ලාම්, ක්‍රිස්ත්‍රියානි අප ශ්‍රී ලාංකිකයින් වෙනුවෙන් ඔබ එය කලේය.

ඉතින් ක්‍රිකට් ක්‍රීඩාවට විශේෂයෙන් ශ්‍රී ලාංකීය ක්‍රිකට් ක්‍රීඩාවට ආදරය කරන්නෙකු ලෙස මම කෙසේ නම් ප්‍රීති නොවී සිටින්නද?


දුක් වන්නට කාරණය..

ඉතින්, සංගා ලෝකය ඉදිරියේ ශ්‍රී ලංකා ක්‍රිකට් නිරුවත් කලේය. ඇත්තෙන්ම එය ඒ වෙන විටත් නිරුවත්ව හමාරය. සංගා කලේ නැවත හෙළුව වසා ගන්නට උත්සාහ දරද්දි රෙද්දෙන් ඇදීමය.

ඇත්තෙන්ම සංගා කලේ කුමක්ද? ශ්‍රී ලංකා ක්‍රිකට් සමග කොන්ත්‍රාතුවකින් බැඳි සිටින ක්‍රීඩකයකුට එය විවේචනය කිරීමේ නීතිමය හිමිකමක් ඇද්ද? මගේ අදහසනම් නැත යන්නය. නීතිය පිළිබඳ උගතෙක් වන සංගාද මෙය නොදැන සිටියා විය නොහැක.එසේ නම්, ලෝක කුසලාන තරඟාවලිය අවසාන කථාවේදි ජනාධිපතිතුමා වෙත ස්තූති කිරීමට ඉදිරිපත් වූ සංගා ඉන් තෙමසක් ඉක්ම යන්නටත් පෙර ක්‍රීඩාවට දේශපාලනය මුහුවී ඇති බවට පවා චෝදනා කරන්නට හදිසි වන්නේ මන්ද?

මගේ අදහස නම් සංගාට මේ මොහොතේ අවශ්‍ය වී ඇත්තේ ශ්‍රී ලංකා ක්‍රිකට් සමග ඇති කොන්ත්‍රාත්තුව අවලංගු කර ගැනීමය. (මෙය සංගා පමණක් නොව තවත් ක්‍රීඩකයින් කිහිප දෙනෙකු විය හැක.) ඉතින්, සංගා කලේ දෙබරයට ගලක් ගැසීමය. ගල ගැසූ සැනින් දෙබරු ඇවිස්සුනු අයුරු ඔබ දකින්නට අසන්නට ඇත.
කෙසේ නමුත්, සැබෑ ශ්‍රී ලාංකීකයෙක් හා සැබෑ ක්‍රීඩකයකු වශයෙන් සංගා ගන්නා තීරණ රට වෙනුවෙන්, ක්‍රිකට් ක්‍රීඩාව වෙනුවෙන් ගන්නා හොඳම තීරණය බවට මම විශ්වාස කරමි.

නමුත්, සංගාගේ තීරණ හමුවේ පරිපාලකයින් කෙසේ හැසිරේද? එය ශ්‍රී ලාංකීය ක්‍රිකට් අනාගතය තීරණය කරන සාධකය වෙනු ඇත. ක්‍රීඩාවේ හරයන් පිළිබඳ අබැටක තරම්වත් නොසිතන පරිපාලනයේ සිටින මුදලාලිලා කෙසේ තීරණ ගනීවිද?

අපි බලා සිටිමු. අවිනිශ්චිතව.